News Centre

Mae Cabinet Cyngor Bwrdeistref Sirol Caerffili wedi cytuno ar gyllideb ddrafft uchelgeisiol nad yw'n cynnwys dim toriadau newydd arfaethedig i wasanaethau ar gyfer 2021/22.

Croesawodd Arweinydd y Cyngor, y Cynghorydd Philippa Marsden, y penderfyniad yng nghyfarfod y Cabinet heddiw (dydd Mercher 13 Ionawr), “Rwy'n falch o'r ffordd y mae'r awdurdod hwn yn parhau i reoli ei gyllideb yn sgil ein rheolaeth ariannol gadarn gyfredol ac ein dull darbodus.

“Rydyn ni'n gweithio'n galed i sicrhau bod y Cyngor yn parhau i fod yn ariannol gadarn yn ystod y cyfnod ansicr hwn, a hoffwn i ddiolch i bawb dan sylw am wneud hyn yn bosibl.

“Rwy'n gwbl gefnogol i gynigion y gyllideb ddrafft, ac rwy'n siŵr y bydd trigolion ledled y Fwrdeistref Sirol yn croesawu'r newyddion na fydd toriadau newydd. Mae'n golygu y gallwn ni barhau i ddiogelu ein gwasanaethau allweddol ar gyfer y dyfodol.”

Bydd y gyllideb ddrafft nawr yn cael ei chyflwyno i gyfarfod y Cyngor Llawn fis nesaf i'w chymeradwyo'n derfynol.

Mae cynigion y gyllideb ddrafft yn cynnwys cynnydd arfaethedig o 3.9% yn Nhreth y Cyngor ar gyfer 2021/22. Byddai hyn yn cyfateb i gynnydd o 89 ceiniog yr wythnos ar gyfer eiddo Band D.

“Mae'n debygol y bydd y cynnydd hwn ymhlith y lleiaf yng Nghymru ac, er nad yw'r un ohonom ni eisiau gweld cynnydd yn Nhreth y Cyngor, mae'n bwysig deall bod hyn yn chwarae rhan bwysig wrth fantoli'r gyllideb,” meddai'r Cynghorydd Marsden wedyn.

Er gwaethaf y darlun cyffredinol cadarnhaol, mae'r Cyngor yn awyddus i bwysleisio nad yw'r setliad gan Lywodraeth Cymru yn ymdrin â goblygiadau'r pandemig coronafeirws cyfredol – o ran y costau ychwanegol na'r incwm a gollir. Bydd hyn yn parhau i gael ei ariannu trwy grantiau yn y flwyddyn ariannol newydd a bydd y sefyllfa'n cael ei hadolygu'n ofalus.

Mae'r adroddiad llawn ar gael yma:

https://democracy.caerphilly.gov.uk/ieListDocuments.aspx?CId=128&MId=12514&LLL=1

https://democracy.caerphilly.gov.uk/ieListDocuments.aspx?CId=128&MId=12514&LLL=0