CORONAFEIRWS (COVID-19) : yr wybodaeth cyngor a chymorth diweddaraf

News Centre

Golau gwyrdd ar gyfer datblygiad tai blaenllaw Pontllan-fraith

Postiwyd ar : 08 Gor 2020

Cafodd caniatâd cynllunio ei rhoi ar gyfer datblygiad tai blaenllaw, ar yr amod na fydd Gweinidogion Cymru yn codi unrhyw wrthwynebiadau, ym Mhontllan-fraith; gan ddod â chartrefi fforddiadwy mawr eu hangen i'r ardal yn y dyfodol.

Cafodd cymeradwyaeth ei roi ar gyfer datblygiad Pentref Gerddi'r Siartwyr yn ystod cyfarfod o bell Pwyllgor Cynllunio Cyngor Bwrdeistref Sirol Caerffili, a gafodd ei gynnal heddiw (dydd Mercher 8 Gorffennaf). Rhoddwyd sicrwydd i’r Cynghorwyr na fyddai'r datblygiad yn tresmasu ar Barc Coffa Harold Finch, sydd wedi'i leoli ger y safle, na'r warchodfa natur a'r Safle o Ddiddordeb Gwyddonol Arbennig (SSSI).

Mae Pentref Gerddi'r Siartwyr yn gydweithrediad cyffrous rhwng y Cyngor a Grŵp Pobl a fydd yn arwain at ddatblygiad deniadol o fewn ôl-troed hen swyddfeydd y Cyngor, Tŷ Pontllan-fraith sy'n cynnwys 125 o gartrefi - o'r rhain, bydd 83 (dwy ran o dair o'r datblygiad) yn fforddiadwy.

Bydd y datblygiad yn dilyn y cysyniad ‘pentref gerddi’, gyda chartrefi mewn arddull celf a chrefft fythol, wedi’u dylunio i wella safonau gofod, wedi’u hadeiladu o amgylch tirwedd o goed stryd, ymylon glaswellt a mannau gwyrdd agored.

I ddechrau, fe wnaeth y Pwyllgor Cynllunio ystyried cynigion Pentref Gerddi'r Siartwyr ar 17 Mehefin lle penderfynwyd gohirio'r cais, ac i swyddogion ddarparu gwybodaeth ychwanegol mewn ymateb i bryderon ynghylch y posibilrwydd o golli man gwyrdd. Yn dilyn hynny, cafodd adroddiad ei ddarparu a'i gymeradwyo, gan ail-gadarnhau na fyddai'r datblygiad yn tresmasu ar y Warchodfa Natur Leol na Pharc Coffa Syr Harold Finch.

Roedd yr adroddiad yn dangos hefyd y lefelau sylweddol o angen tai yn yr ardal, ynghyd ag ymrwymiad Pobl i ddarparu tai fforddiadwy ar y datblygiad ar lefel sy'n uwch na gofynion polisi'r Cyngor.

Dywedodd y Cynghorydd Lisa Phipps, Aelod Cabinet y Cyngor dros Gartrefi, Lleoedd a Thwristiaeth, “Mae darparu tai fforddiadwy o ansawdd uchel yn flaenoriaeth allweddol i'r Cyngor. Bydd Pentref Gerddi'r Siartwyr yn cynnig amrywiaeth o opsiynau tai ar gyfer pobl leol ar ddatblygiad blaenllaw ac mewn prif leoliad.

Yn ogystal â thai fforddiadwy, mae partneriaeth y Cyngor â Pobl hefyd yn cyflwyno'r posibilrwydd ar gyfer buddsoddiad ehangach yn yr economi leol, fel creu swyddi a chyfleoedd hyfforddi."

Ychwanegodd Neil Taylor, Pennaeth Datblygu (Dwyrain) Pobl, “Rydyn ni’n falch o gydweithio â Chyngor Caerffili ar y cynllun blaenllaw hwn. Ein gweledigaeth yw creu pentref gerddi modern gydag ymdeimlad gwirioneddol o le a chymuned, gan ddefnyddio egwyddorion dylunio da a thrwy wella'r seilwaith gwyrdd presennol.

Bydd Pentref Gerddi'r Siartwyr yn cynnig cyfuniad o opsiynau tai gan gynnwys tua dwy ran o dair o dai fforddiadwy, gan gynnwys rhent cymdeithasol a chartrefi cydberchnogaeth, yn ogystal â phrynu cartrefi yn gyfan gwbl. Rydym hefyd wedi ymgorffori nodweddion draenio trefol cynaliadwy yn y dyluniad gan gynyddu nifer y mannau gwyrdd ac ardaloedd chwarae naturiolaidd.”

Rhannwch y dudalen hon :

Rhannwch ar Facebook

Rhannwch ar Twitter

Newyddion Diweddar

Ymholiadau'r Cyfryngau

Gwasanaethau A i Y