Gwasanaeth Archebu a Chasglu
O Ddydd Llun 24 Awst 2020, bydd trigolion sy’n dwlu ar lyfrau a darllen yn gallu manteisio ar fenter gwasanaeth llyfrgell newydd o’r enw ‘Archebu a Chasglu’.
Sut mae Archebu a Chasglu yn gweithio?
Gallwch archebu eitemau gan ddefnyddio un o dri opsiwn:
1. Llenwi a chyflwyno ffurflen gais Archebu a Chasglu
Sylwch, ni fydd y ffurflen hon yn gweithio o fewn Internet Explorer. Defnyddiwch borwr mwy modern fel Edge, Chrome neu Safari
2. Mewngofnodi a mynd i gatalog y llyfrgell. Yma, gallwch drefnu archebion ar gyfer teitlau unigol.
3. Neu, os yw'n well gennych chi, gallwch gysylltu â ni ar un o'r rhifau hyn a bydd aelod o staff yn llenwi'r ffurflen ar eich rhan.
Dydd Llun i ddydd Gwener, 9am - 1pm ac 2pm - 5pm
- 07523 931965
- 07523 931969
- 07713 399806
Dydd Llun i ddydd Gwener, 4.30pm – 6pm, Dydd Sadwrn 10am – 3pm
4. Bydd aelod o dîm y llyfrgell yn asesu'ch cais ac yn paratoi eich archeb.
5. Byddwn ni'n eich ffonio i roi gwybod i chi fod eich llyfrau'n barod a threfnu dyddiad ac amser i'w casglu.
6. I ddychwelyd llyfrau, rhowch nhw yn y Bin Dychwelyd Llyfrau a fydd wrth fynedfa'r llyfrgell. Mae modd gwneud hyn ar unrhyw adeg yn ystod oriau agor neu wrth gasglu'ch archeb nesaf.
Sylwch mai dim ond drwy'r broses hon y mae Archebu a Chasglu ar gael. Ni chaniateir i chi fynd i'r llyfrgell oni bai bod staff y llyfrgell wedi cysylltu â chi i gasglu eitem neu os ydych chi am ddefnyddio'r Biniau Dychwelyd Llyfrau.
Ym mha lyfrgelloedd y gallaf gael mynediad at y gwasanaeth hwn?
Mae'r gwasanaeth Archebu a Chasglu ar gael ym mhob llyfrgell ym Mwrdeistref Sirol Caerffili.
A yw hyn yn ddiogel?
Mae'r rhaglen Archebu a Chasglu yn cydymffurfio â chyfarwyddebau iechyd a diogelwch cyfredol.
Sut mae benthyg llyfrau?
Bydd eich llyfrau eisoes wedi'u benthyg i'ch cyfrif a byddan nhw'n barod i'w casglu. Gofynnwn i chi ddod â'ch bag eich hun, ond bydd modd i ni ddarparu bag y mae modd ei ailddefnyddio ar gais.
O ble rydw i'n casglu fy llyfrau?
Pan fyddwn ni'n cysylltu â chi i roi gwybod i chi fod eich llyfrau'n barod i'w casglu, byddwch chi'n derbyn dyddiad ac amser penodedig i'w casglu. Yn syml, ewch i fynedfa'r llyfrgell rydych chi wedi'i dewis i gasglu'ch llyfrau ar yr amser a'r dyddiad sy'n cael eu rhoi. Bydd aelod o staff yn eich tywys trwy'r broses.
Am ba mor hir gallaf i gadw'r llyfrau?
Bydd llyfrau'n cael eu benthyg am y cyfnod benthyciad arferol o dair wythnos.
A oes modd i fi adnewyddu eitemau?
Mae modd adnewyddu pob eitem fel arfer drwy eich cyfrif llyfrgell ar-lein neu dros y ffôn trwy gysylltu â'ch llyfrgell gasglu ddynodedig. Atgoffir cwsmeriaid na fydd modd adnewyddu eitemau sy'n destun cais gan ddarllenydd arall.
A gaf i ofyn am lyfr penodol?
Gallwch. Fodd bynnag, ar hyn o bryd gallwch wneud cais am lyfr o lyfrgell Archebu a Chasglu yn unig. Mae modd gwneud cais trwy'r gwasanaeth ar-lein neu drwy'r gwasanaeth Slip Cais, ond sylwch na fydd ein stoc lawn y llyfrgell ar gael i'w gweld ar-lein.
Pan fydd eich llyfrau yn barod i'w casglu, byddwn yn cysylltu â chi.
Mae gwasanaethau ymgeisio am stoc llyfrgell bellach ar gael. Am fanylion, holwch aelod o'r staff.
A oes terfyn ar nifer y llyfrau mae modd i fi eu benthyg?
Oes. Yn ystod y cyfnod yma, dim ond wyth eitem cewch chi eu benthyg ar y tro. Byddwn ni'n ailgyflwyno'r cyfyngiad benthyg llawn o ddeg eitem cyn gynted â phosibl.
A ydw i'n cael dod i ddychwelyd fy llyfrau, heb gasglu rhai newydd?
Ydych. Darperir Biniau Dychwelyd Llyfrau y tu allan i'n llyfrgelloedd sydd ar agor. Mae modd rhoi unrhyw eitemau i'w dychwelyd yn y biniau hyn. Ni chewch chi fynd i mewn i'r llyfrgell ar hyn o bryd. Gofynnwn i chi beidio â symud unrhyw eitemau o'r Biniau Dychwelyd Llyfrau.
A fydd pob llyfrgell yn cynnig y gwasanaeth yma?
I ddechrau, dim ond yn llyfrgelloedd Bargod, Caerffili, Coed Duon, Rhisga, Rhymni, Trecelyn ac Ystrad Mynach y bydd y gwasanaeth Archebu a Chasglu ar gael. Y gobaith yw ymhen amser y bydd rhagor o lyfrgelloedd yn cael eu hychwanegu at y gwasanaeth yma.
Beth os oes gen i ffioedd heb eu talu?
Ni fydd unrhyw ffioedd na thaliadau wedi cronni ar gyfrifon cwsmeriaid am y cyfnod y mae'r llyfrgelloedd wedi bod ar gau oherwydd y pandemig COVID-19. Gweithredir unrhyw ffioedd a thaliadau a gronnwyd cyn y cyfnod hwn pan fydd y gwasanaeth arferol yn ailddechrau. Peidiwch â phoeni os oes dirwyon arnoch chi.
A oes modd i aelodau eraill o'm teulu drefnu apwyntiad i gasglu llyfrau?
Mae modd i aelodau unigol y llyfrgell drefnu apwyntiad, felly mae modd i bob aelod o'r teulu drefnu apwyntiad. Pan ddewch chi i'r llyfrgell i gasglu eitemau, gofynnwn fod cyn lleied â phosibl o bobl o'r un teulu yn dod ar yr un pryd. Fodd bynnag, deallwn fod modd i amgylchiadau personol olygu bod angen i chi ddod gydag un neu ragor o aelodau o'r teulu.
A oes modd i fi ddefnyddio unrhyw un o'r cyfleusterau eraill y mae'r llyfrgell yn eu cynnig?
Nac oes, ddim ar hyn o bryd. Wrth i gyfyngiadau lacio, gobeithiwn ailgyflwyno gwasanaethau eraill gam wrth gam.
A fydd angen i mi giwio?
Bydd cwsmeriaid yn cael amser penodol i gasglu eitemau ond mae'n bosibl y bydd angen i chi giwio y tu allan i'r llyfrgell am gyfnod byr os byddwch chi'n cyrraedd yn gynnar. Gofynnwn i chi gadw at reolau cadw pellter cymdeithasol a pharchu staff y llyfrgell os bydd angen iddyn nhw ofyn i chi gymryd eich lle mewn ciw.
Beth ddylwn i ei wneud os bydda i'n colli fy amser casglu?
Os byddwch chi'n colli'ch amser casglu, fydd dim modd i staff y llyfrgell eich gwasanaethu. Bydd angen i chi drefnu amser casglu newydd. Er mwyn cadw pellter cymdeithasol ac i gadw staff ac aelodau'r llyfrgell yn ddiogel, bydd angen i ni gadw at yr amserlen wedi'i chynllunio ymlaen llaw. Os ydych chi wedi colli'ch slot, siaradwch ag aelod o staff ar ddyletswydd, gan gadw pellter cymdeithasol, a bydd modd iddo/iddi eich cynghori.
Rydw i wedi archebu eitemau o'r llyfrgell sydd angen eu casglu
Cyn cau'r llyfrgelloedd, efallai eich bod wedi derbyn neges gennym yn rhoi gwybod i chi fod eitem rydych chi wedi archebu bellach ar gael i chi ei benthyg. Mae'r eitemau hyn yn dal ar gael i chi a bydd staff y llyfrgell yn cysylltu â chi i weld a ydych chi dal am eu casglu. Os ydych, byddan nhw'n trefnu dyddiad ac amser casglu gyda chi.
Mae'r Gwasanaeth Llyfrgelloedd a'i staff yn gwerthfawrogi eich cydweithrediad a'ch dealltwriaeth yn ystod y cyfnod anodd yma. Rydyn ni'n edrych ymlaen at eich gweld ac yn gobeithio gallu agor ein drysau i drigolion wrth i gyfyngiadau Llywodraeth Cymru gael eu codi.