Sicrhawyd cyllid gan Lywodraeth Cymru i alluogi'r awdurdod i greu llwybr cerdded a beicio Teithio Llesol yn Ystrad Mynach.
Ymgynghorodd y Cyngor â phreswylwyr y fwrdeistref sirol ynghylch eu barn a'u cynigion o ran gwella isadeiledd cerdded a beicio ar gyfer teithiau pob dydd yn y gymuned. Roedd yr ymgynghoriad hwn yn sail i greu Map Rhwydwaith Integredig Teithio Llesol o ran llwybrau i'w datblygu er mwyn eu gwneud yn addas ar gyfer cerdded, beicio a theithio ar gefn sgwter.
Y llwybr rhwng Pengam ac Ystrad Mynach yw un o'r llwybrau a nodwyd ar gyfer eu gwella er mwyn galluogi rhagor o bobl i ddefnyddio dulliau cynaliadwy ar gyfer teithiau pob dydd, ac mae wedi cael ei flaenoriaethu. Gwahoddir preswylwyr a pherchnogion i adolygu'r cynigion a chyflwyno sylwadau fel rhan o'r ymgynghoriad cyhoeddus ynglŷn â'r cynllun hwn.
Bydd y cynllun arfaethedig, sy'n cael ei ariannu gan Lywodraeth Cymru, yn darparu'r gwelliannau canlynol:
-
Ymestyn y terfyn cyflymder 20mya presennol, gan gynnwys mesurau gostegu traffig ar hyd Heol Pengam, Ystrad Mynach.
-
Gwella'r pyrth 20mya presennol ledled canol y dref.
-
Newidiadau i'r droedffordd ymwthiol ar Heol Pengam ar bwys y gyffordd â Stryd Davies.
-
Gwella'r marciau ffordd a'r arwyddion cysylltiedig i gyflwyno lonydd beicio ymgynghorol.
-
Adeiladu tri thwmpath pen gwastad newydd a fydd yn cynnwys croesfan sebra wrth y gyffordd â Stryd Davies.
-
Creu safle bysiau/troedffordd ymwthiol newydd ar bwys 43/45 Heol Pengam ar gyfer bysiau sy'n teithio tua'r dwyrain er mwyn cynnwys croesfan sebra newydd.
Mae'ch sylwadau, eich barn a'ch awgrymiadau yn bwysig i ni, a byddant yn helpu'r Cyngor i ddatblygu manylion terfynol y cynllun; bydd yr holl sylwadau sy'n ymwneud â'r cynnig yn cael eu hystyried.
Er mwyn galluogi cyfranogiad, mae digwyddiad ymgynghori wedi'i drefnu yn Ysgol Lewis i Ferched ar 16 Gorffennaf 2019 rhwng 16:30 a 18:30. Bydd swyddogion y Cyngor ar gael i ateb eich cwestiynau yn y digwyddiad. Os na allwch fynychu'r digwyddiad hwn, gallwch hefyd weld y cynnig, a chyflwyno barn a sylwadau drwy lenwi holiadur, ar y wefan hon tan 23 Gorffennaf 2019; ar ôl y cyfnod hwn, bydd y Cyngor yn tybio nad ydych am wneud unrhyw sylwadau.
|