10  YMGYSYLLTU A GWEITHIO GYDA’N CYMUNEDAU

Nod ein rhaglen trawsnewid #TîmCaerffili yw ail-siapio’r Cyngor at y dyfodol. Rhaid inni wneud pethau’n wahanol er mwyn amddiffyn y gwasanaethau y mae eu hangen ac sy’n cael eu gwerthfawrogi.

Rhaid inni hefyd gydnabod y bydd y sefydliad, yn ddiau, yn llai ac y bydd yn darparu llai o wasanaethau, a’i bod yn bosibl y bydd yn darparu’r gwasanaethau sy’n weddill mewn ffordd wahanol.

Rydym eisiau gwneud hyn mewn ffordd ystyriol, sy’n deall angen, yn ystyried ein cymunedau, yn cynllunio ar gyfer yr hyn mae’n rhaid inni ei ddarparu, ac yn cefnogi ein staff wrth iddynt ein helpu i wneud hyn.

Mae cyfathrebu ac ymgysylltu effeithiol yn sylfaenol i’r agenda trawsnewid, a byddwn yn cyflawni hyn gyda’n cymunedau trwy Drafodaeth Caerffili.

Rhaid inni fod yn agored ac yn onest gyda’n cymunedau er mwyn rheoli disgwyliadau; rydym eisiau i’n cymunedau chwarae rhan allweddol yn y daith trawsnewid hon ac rydym eisiau gwneud hyn gyda chefnogaeth ein preswylwyr.

Mae’n bwysig i’n cymunedau ddeall a chefnogi’r llwybr rydym wedi’i gymryd; byddant hwythau’n pryderu am wasanaethau ar gyfer cenedlaethau’r dyfodol. Rydym yn ffyddiog bod gennym gyd-ddealltwriaeth bod yn rhaid inni edrych at y dyfodol, ac ar yr un pryd cadw at ein hegwyddorion cymdeithasol, er mwyn amddiffyn ein gwasanaethau a’u diogelu at y dyfodol.

Rydym eisoes wedi ymrwymo i’r Egwyddorion Cenedlaethol ar gyfer Ymgysylltu â’r Cyhoedd yng Nghymru, a hoffem ymestyn lefel cyfranogiad cymunedau yn ein cydnodau. Byddwn yn defnyddio arferion gorau’r Gymdeithas Cyfranogiad Cyhoeddus Ryngwladol i Hysbysu, Ymgynghori, Cynnwys, Cydweithio a Grymuso ein cymunedau. Byddwn yn datblygu Fframwaith Ymgynghori ac Ymgysylltu i gefnogi hyn.

Ar hyn o bryd rydym yn darparu amrywiaeth fawr o wasanaethau dewisol mae ein cymunedau wedi arfer â nhw. Er mwyn inni barhau i ddarparu rhai o’r gwasanaethau dewisol hyn yn y dyfodol (h.y. y pethau nad oes rhaid inni eu gwneud o dan y gyfraith), bydd arnom angen help cymunedau a’r sector gwirfoddol i’n cynorthwyo i’w darparu.

Ni ellir tanbrisio rôl cymunedau cydnerth, wedi’u grymuso ar y daith trawsnewid hon. Er bod hwn yn gyfnod anodd, mae hefyd yn gyfle i goleddu newid a datblygu ffyrdd newydd o ddarparu gwasanaethau’r Cyngor, gyda chymorth ein cymunedau er budd pawb.

Mae gan dde Cymru ymdeimlad unigryw o gymuned nad yw’n bresennol mewn llawer o rannau eraill o’r Deyrnas Unedig. Dyma ein cyfalaf cymdeithasol; rydym yn gofalu am ein gilydd. Rhaid i ethos #TîmCaerffili olygu bod gennym ni i gyd, ni waeth pwy ydym ni – Cynghorwyr, staff, preswylwyr, y gymuned busnes, partneriaid, pobl ifanc ac ati – ran i’w chwarae wrth gyfrannu at les ein hardal.

Byddwn yn gweithio gyda’n cymunedau i’w hannog i barhau â’r arferion da sydd ganddynt eisoes, h.y. arferion fel ailgylchu mwy, peidio â thaflu sbwriel, gwirfoddoli yn eu hardal leol, cefnogi chwaraeon ar lawr gwlad, cymryd rhan mewn sesiynau glanhau amgylcheddol ac ati. Gallwn i gyd wneud ein rhan dros Fwrdeistref Sirol Caerffili, mae cymunedau wedi’u grymuso’n hanfodol wrth drawsnewid y Fwrdeistref Sirol.